Heillandi á Austurlandi
Gönguleiðir
Austurland er paradís göngumannsins og fjölbreyttar gönguleiðir eru stolt svæðisins. Hægt er að velja um mikilfengleg svæði í óbyggðum með skálagistingu, sem styttri leiðir um gróna dali, sanda og fjörur. Allir geta fundið eitthvað við sitt hæfi, hvort sem menn vilja dagsferðir eða lengri ævintýragöngur. Gefin hafa verið út gönguleiðakort fyrir stærstan hluta svæðisins svo að auðvelt er að ganga á eigin vegum en jafnframt er mikið um skipulagðar gönguferðir.
Menning
Íbúar Austurlands eru fáir en menning þeirra er ríkuleg og fjölbreytt. Þjóðsögur af álfum, tröllum, skrímslum og óvættum eru fólkinu í blóð bornar og hafa ásamt stórbrotinni náttúru mótað skapandi einstaklinga sem vita hvað þeir vilja. Áhugaverð söfn og setur sem sýna llt frá harðri lífsbaráttu fyrri alda og til tæknibyltingar þeirrar tuttugustu er víða að finna. Listsýningar, leiksýningar, tónleikar og bæjarhátíðir er meðal þess sem íbúar fjórðungsins standa fyrir, taka þátt í og leyfa gestum sínum að njóta.
Firðir
Djúpir firðir setja sterkan svip sinn á Austurland með háum fjallgörðum og hallandi blágrýtislögum. Fengsæl fiskimið leiddu til uppbyggingar á hafnsælum stöðum. Franskir duggarar sóttu þorsk í greipar Ægis úti fyrir Austfjörðum og norskir athafnamenn byggðu upp sjávarpláss kringum síldarævintýri og hvalveiðar. Nú er öldin önnur og nútímatækni beitt við veiðar og vinnslu í blómlegum útgerðarbæjum víðs vegar um fjórðunginn. Og á land berst sælkeramatur eins og humarinn sem veiðist úti fyrir söndum Suðausturlands.
Skógar
Enginn landsfjórðungur getur státað af eins fjölbreyttum og fögrum skógum og Austurland.
Bæjarstaðaskógur í þjóðgarðinum Skaftafelli er einn fegursti og hávaxnasti birkiskógur landsins enda friðaður frá náttúrunnar hendi fyrir ágangi dýra og manna um aldir. Hinn rómaði Hallormsstaðaskógur hefur lengi talist stærstur skóga á Íslandi og í honum er trjásafn sem á engan sinn líka á norðlægum slóðum. Með tilkomu bændaskógræktar á Fljótsdalshéraði og víða á Austfjörðum hefur fjölgað þeim grænu lundum er veita gestum og gangandi skjól og yndi.
Vatnajökull
Vatnajökull, stærsti jökull Evrópu, hefur mótað landslag og sögu Austurlands um árþúsundir. Frá honum falla vatnsmikil fljót landsinssem kvíslast um hálft Ísland. Stærsti þjóðgarður Evrópu varð til 2004 þegar suðurhluta jökulsins var bætt við þjóðgarðinn í Skaftafelli og unnið er að frekari stækkun hans. Í Vatnajökli mætast frumkraftar elds og ísa með ótrúlegu sjónarspili í Kverkfjöllum og virkasta eldstöð landsins, Grímsvötn, gýs á 5-10 ára fresti. Sunnan við jökulinn er mikilfengleg jöklasýn þar sem skriðjöklar mæta grösugum sléttum og víðáttumiklum söndum. Þar hefur sambúðin við jökulinn sett svip sinn á mannlífið um aldir og heimurinn upplifað Jökulsárlón og fleiri staði í heimskunnum kvikmyndum. Varasamt er fyrir ókunnuga að fara á jökulinn þó að aðgengi sé víða gott og æskilegt að leita upplýsinga hjá kunnugum. Þá er boðið upp á þjónustu og ferðir fyrir jöklafara bæði sunnan og norðan jökuls.
Hreindýr og fuglar
Hreindýr voru flutt frá Noregi til Íslands seint á 18. öld. Í dag lifa þessi tignarlegu dýr aðeins á Austurlandi í villtum hjörðum sem halda sig hátt í fjöllum á sumrin en leita niður á láglendið yfir vetrarmánuðina. Kjörsvæði þeirra er á öræf-unum við Snæfell en dýrin sjást ár hvert allt frá Vopnafirði og suður í Suðursveit. Mikil ásókn er í veiðileyfi á hreindýr enda er hreindýrakjöt eitthvert mesta hnossgæti sem íslensk náttúra hefur upp á að bjóða. Aðstæður til fuglaskoðunar eru óvíða betri en á Suðausturlandi og þar er eina fuglaskoðunarstöð landsins. Farfuglar og flækingar hvíla sig við austurstrendur eftir langt flug yfir Atlantsála. Á Skeiðarársandi eru heimkynni skúmsins, fellisvæði heiðargæsar á Eyjabökkum og hægt að ganga um lundabyggð á Borgarfirði eystri.
Back
