Leita
Finnur þú það ekki? Prófaðu leitina :)

Hengifoss gistihús

Undir hinu fagra Valþjófsstaðafjalli við Tröllkonustíg stendur Hengifoss gistihús við Végarð í Fljótsdal. Dalurinn er með veðursælli stöðum landsins. Boðið er upp á gistingu í tveggja til fjögurra manna herbergjum með uppábúnum rúmum með sér baðherbergi. Nokkur herbergi eru með eldunaraðstöðu. Einnig er í húsinu salur með kamínu þar sem gestir geta notið morgunverðar og kvöldverðar. Kvöldverð er hægt að fá frá 18. júní til loka ágúst og morgunverð alla morgna sé þess óskað.

Þá er hægt er að fá gistingu í herbergjum með sameiginlegu baðherbergi og eldhúsi. Við bjóðum jafnframt upp á svefnpokagistingu í sér herbergjum með rúmum.

Hjá okkur er líka fullbúið tjaldstæði með rafmagni, góðri snyrtingu, grillaðstöðu og leiksvæði.

Aðstaðan okkar hentar vel fyrir brúðkaup, ættarmót, starfsmannaferðir og minni fundi. Félagsheimilið Végarður er á sama stað og þar má leigja stærri sal.

Nóg er að skoða í næsta nágrenni. Má þar nefna Skriðuklaustur (1 km). Þar er safn og kaffihús og á þar rétt við er Snæfellsstofa, gestastofa Vatnajökulsþjóðgarðs með upplýsingum um hálendið í máli og myndum. Hengifoss, einn hæsti foss landsins, er líka á næsta leiti (6 km) sem mörg þúsund manns leggja leið sína að ár hvert. Strútsfoss er í Suðurdal og er þægileg gönguleið að fossinum frá bænum Sturluflöt (13 km).

Valþjófsstaðarkirkja er í göngufæri frá gistihúsinu en þar er eftirlíking af hinni fornu Valþjófsstaðahurð. Svo má ekki gleyma Óbyggðasetri Íslands í Fljótsdal en heimsókn þangað er mögnuð upplifun. Það er stutt upp í Laugarfell (um klukkustundar akstur) og þar er hægt að baða sig í náttúrulaugum. Hæsta fjall Íslands utan jökla, Snæfell er ein af mestu perlum Íslands og blasir það við þegar ekið er upp að Laugarfelli. Haldi menn ferð sinni áfram er hægt að aka á malbikuðum vegi alla leið að Kárahnjúkastíflu.

Hengifoss gistihús

Végarður, Fljótsdal

GPS punktar N65° 1' 35.684" W14° 58' 19.626"
Gisting 4 Herbergi / 13 Rúm
Opnunartími 15/01 - 15/12
Þjónusta Losun skólptanka Athyglisverður staður Gönguleið Heimilisveitingar Bensínstöð Hjólhýsasvæði Sundlaug Veiðileyfi Eldunaraðstaða Aðgangur að interneti Sturta Golfvöllur Kjörbúð Banki Flugvöllur Tekið við greiðslukortum Bar Bílferja

Hengifoss gistihús - ferðaupplýsingar

Úr gagnagrunni Ferðamálastofu Íslands

Aðrir

Bátaleigan Atlavík
Bátaferðir
  • Hallormsstaður
  • 701 Egilsstaðir
  • 847-0063, 867-1441, 847-3706
Náttúra
15.15 km
Bjargselsbotnar

Gengið frá skilti rétt við Hússtjórnarskólann og fylgt stikum ljósgrænum að lit. Leiðin liggur í gegnum framhlaupsurð, sem myndaðist fyrir um 10.000 árum og nefnist Hólar. Áfram er haldið upp í Bjargselsbotna, inn eftir, undir Bjarginu að Þverbjargi þar sem Illaskriða hefur fallið. Út og niður af Illuskriðu er gengið niður að Leirtjarnarhrygg. Þar er að finna hólkinn með gestabók og stimpli.

Bjargselsbotnar eru hluti af Perlum Fljótsdalshéraðs.

GPS : N65°05.465-W14°43.031

Powered by Wikiloc
Náttúra
17.95 km
Hallormsstaðaskógur

Hallormsstaðarskógur er víðáttumesti skógur landsins. Hann liggur meðfram Lagarfljóti (Leginum) að austanverðu. Árið 1903 hófust þar tilraunir með plöntun erlendra trjáa en stórfelld ræktun hófst fyrst eftir 1950. Nú hafa verið gróðursettar í Hallormsstaðarskógi um 50 tegundir erlendra trjáa frá 177 mismunandi stöðum. Elsti lerkilundurinn var gróðursettur árið 1938 og heitir Guttormslundur, kenndur við Guttorm Pálsson sem var skógarvörður á Hallormsstað í 46 ár. Atlavík er innarlega í skóginum en við hana er vinsælt tjaldsvæði. Í Hallormsstaðarskógi hefur nú fjölmargt verið gert til að gera ferðafólki svæðið aðgengilegt, m.a. hafa verið lagðir göngustígar um skóginn auk þess sem opnað hefur verið trjásafn í gróðrarstöðinni Mörkinni sem enginn ætti að láta fram hjá sér fara á ferð um Austurland.

Náttúra
17.66 km
Hallormsstaður

Hallormsstaður var fyrrum prestssetur og kirkjustaður. Byggðahverfi hefur myndast á Hallormsstað í tengslum við skólahald, ferðaþjónustu og starfsemi Skógræktar ríkisins. Hallormsstaðarskógur er stærstur skóga á landinu. Skógræktarstöð var stofnsett á Hallormsstað árið 1903 og skógurinn friðaður 1905.

Þar er nú merkilegt trjásafn að finna. Göngustígur liggur um safnið og eru þar listsýningar og ýmsar uppákomur, meðal annars Bændadagurinn. Atlavík, innarlega í skóginum við fljótið, er vinsæll áningarstaður ferðamanna.

Náttúra
16.56 km
Atlavík

Atlavík er frægur samkomustaður Austfirðinga og annarra á meðan hinar frægu Atlavíkurhátíðir voru. Í dag er þetta rómantískt tjaldstæði þar sem göngustígar liggja til allra átta. Á Hallormsstað er rekin hestaleiga og bátaleiga.

Náttúra
0.64 km
Valþjófsstaður

Valþjófsstaður er jörð innarlega í Fljótsdal, kirkjustaður og fornt höfuðból allt frá þrettándu öld. Þar má sjá eftirgerð Valþjófstaðar-hurðarinnar frægu sem er eitthvert mesta djásn í vörslu Þjóðminjasafns Íslands. Hurðin er frá 13. öld og mun upphaflega hafa verið skálahurð á höfðingjasetri en var síðan nýtt sem innri hurð í mikilli stafkirkju sem stóð á Valþjófstað í margar aldir, langt fram yfir siðaskipti.

Saga og menning
14.21 km
Lagarfljótsormurinn

Í Leginum býr Lagarfljótsormurinn sem er frægasta skrímsli Fljótsdalshéraðs. Fyrstu sagnir af orminum eru frá árinu1345 svo hann er komin til ára sinna. Í byrjun var ormurinn lítill og var settur í kistil ofan á gullhring, því alkunna var að með þeim hætti uxu gullfjársjóðir. Þegar stúlkan sem átti hringinn lauk svo kistilinum upp, sá hún sér til hrellingar að ormurinn hafði bólgnað út en hringurinn ekki.
Hún kastaði kistlinum með öllu innihaldi í Lagarfljót og þar stækkaði ormurinn þar til hann var orðin að skrímsli sem hrelldi fólk ef það kom of nálægt honum. Einnig spúði hann eitri upp á tún og gerði annan óskunda fólki til miska. Margar sagnir hafa sprottið um orminn í tímans rás og sumar skjalfestar. Sagt er að hann sé nú bundinn við botninn þannig að hryggur hans nái aðeins yfirborðinu þegar hann lætur illa, og að lengt hans sé á við lengd fótboltavallar.

Náttúra
6.31 km
Múlakollur

Þingmúli skiptir Skriðdal í Norðurdal og Suðurdal en hringvegurinn liggur einmitt um Suðurdal til Breiðdals. Bærinn Þingmúli var helsti þingstaður Austfirðinga í nokkrar aldir og eru Múlasýslurnar nefndar eftir honum. Fremsti hluti Þingmúla er Múlakollur. Gengið frá skilti beint upp hrygginn, um það bil 400 metra hækkun. Síðan er gaman að ganga inn fjallið og niður austan megin nokkuð innan við Múlastekk. Á þeirri leið má sjá fallegt kubbaberg.

Einnig er hægt að ganga inn með fjallinu upp frá Múlastekk.

Þingmúli er hluti af Perlum Fljótsdalshéraðs.

GPS : N65°01.624-W14°38.049

Powered by Wikiloc
Náttúra
13.95 km
Hengifoss

Hengifoss er í norðanverðum Fljótsdal á móts við innri enda Lagarfljóts. Hann er næst-hæsti foss landsins, 128 m hár. Í fossbrúninni eru blágrýtislög en undir þeim sandsteinn.Í berginu finnast steingerðir trjástofnar sem vitna um mun hlýrra loftslag, enda er sandsteinninn myndaður á tertíertíma. Nokkru neðan við Hengifoss er annar foss, Litlanesfoss, lukinn óvenju fallegri stuðlabergsumgjörð.

Auðvelt er að ganga upp að Hengifossi frá upphafsstað en það tekur um 40-60 mínútur að ganga frá bílastæði að fossinum.

Hengifoss er einn vinsælasti ferðamannastaður Austurlands.

www.hengifoss.is


Powered by Wikiloc
Saga og menning
8.83 km
Hrafnkelsstaðir

Hrafnkelsstaðir er býli í Fljótsdal. Þar bjó fyrrum Hrafnkell Freysgoði Hallfreðarson eftir að hann hafði verið hrakinn frá Aðalbóli í Hrafnkelsdal, að því er segir í sögu hans. Í landi Hrafnkelsstaða er Ranaskógur . Er hann yst á svonefndum Rana, en svo nefnist endi Víðivallaháls. Hálsinn mun fyrrum hafa verið vaxinn skógi.

Náttúra
8.08 km
Skriðuklaustur

Skriðuklaustur er fornt höfuðból og sýslumannssetur í Fljótsdal. Munkaklaustur var þar 1493-1552. Klausturrústirnar eru fundnar og þar er fornleifauppgröftur sem leitt hefur í ljós að þar hafa verið stundaðar lækningar og bókagerð og ýmsir merkir munir hafa fundist. Leiðsögn er um svæðið á sumrum. Á Skriðuklaustri er grafinn Jón hrak sem frægur er af kvæði Stephans G. Stephanssonar (1853-1927). Gunnar Gunnarsson skáld (1889-1975) settist að á Skriðuklaustri árið 1939 og reisti þar einstætt stórhýsi, teiknað af þýskum arkitekt. Skáldið gaf íslenska ríkinu jörðina þegar það flutti til Reykjavíkur árið 1948. Þar var lengi tilraunastöð í landbúnaði en árið 2000 hóf Stofnun Gunnars Gunnarssonar starfsemi sína þar. Skriðuklaustur er nú rekið sem menningar-og fræðasetur. Yfir sumarið eru margvíslegar sýningar í boði og gestum veitt persónuleg leiðsögn um hús skáldsins.

Austurland

Bæir og þorp

Allir bæir á Austurlandi hafa sín sérkenni og í sumum sjávarþorpunum má sjá greinileg erlend áhrif. Til að mynda á Fáskrúðsfirði þar sem frönsk áhrif eru sterk. Þar má t.d. lesa götuheitin á íslensku og frönsku! Þá má sjá norsk áhrif í byggingum á Eskifirði og á Seyðisfirði en þarlendir sjómenn höfðu búsetu á þessum stöðum á síðustu og þarsíðustu öld. Á Egilsstöðum eru engin slík áhrif að finna en bærinn er sá yngsti á Austurlandi, varð til á fimmta tug aldarinnar sem leið, og hefur orðið að þjónustumiðstöð Austurlands.  

Map Vopnafjörður Borgarfjörður Eystri Egilsstaðir Seyðisfjörður Mjóifjörður Neskaupstaður Breiðdalsvík Eskifjörður Reyðarfjörður Fáskrúðsfjörður Stöðvarfjörður Djúpivogur