Leita
Finnur þú það ekki? Prófaðu leitina :)

Sundlaugin Selárdalur

undlaugin Selárdalselardalslaugm.jpg

Sími: 473 1499 - 473 1331
netfang: info@vopnafjardarhreppur.is

Sundlaugin er 3,5 km frá þjóðvegi 85 á leið til Bakkafjarðar, 12 km frá Vopnafjarðarkauptúni. Laugin stendur á bakka Selár þar sem hún rennur í grunnu gljúfri. Leitun er að jafn fagurri staðsetningu fyrir sundlaug enda laugin rómuð fyrir umhverfi sitt. Rétt við sundlaugina er uppspretta með heitu vatni og var vatn úr þeirri uppsprettu notað til margra ára í sundlaugina. Í dag er uppsprettuvatnið nýtt til að hita upp vatnið í sundlauginni.

Aðgengi fyrir hreyfihamlaða er gott við Selárlaug. Þar er nestisaðstaða og stór sólpallur ásamt rúmgóðum heitum potti og barnalaug.


Laugin var byggð sumarið 1949 af félagsmönnum í Einherja, ungmennafélagi Vopnafjarðar. Byggðu þeir laugina að mestu í sjálfboðavinnu og var hún vígð sumarið 1950. Endurbætur hafa verið gerðar á lauginni og er hún í ágætu ástandi, ávallt hefur þess verið gætt að halda umhverfi laugarinnar snyrtilegu. Fram undir 1975 var sundkennslu þannig háttað að nemendur dvöldu 1/2 mánuð í vist í húsum laugarinnar og mun oft hafa verið glatt á hjalla á þessum sundnámskeiðum.

Sundkennsla fer fram í sundlauginni að hausti og vori.

Opnunartími Selárlaugar


Sumar:
Sumartími (16. maí - 30. september)

Virka daga mánudaga- föstudaga: kl. 10:00 til kl. 22:00.
Um helgar laugardaga- sunnudaga: kl. 10:00 til kl. 22:00.


Vetur:
Vetrartími (01. okt. - 15. maí)

Virka daga þriðjudaga - föstudaga: kl. 14:00 til kl. 18:00. Lokað mánudaga.
Um helgar laugardaga- sunnudaga: kl. 12:00 til kl. 16:00.

3157_1___Selected.jpg
Sundlaugin Selárdalur

Selárdalur

GPS punktar N65° 48' 7.616" W14° 54' 37.022"
Sími

473-1499

Opnunartími Allt árið
Flokkar Sundlaugar

Sundlaugin Selárdalur - ferðaupplýsingar

Úr gagnagrunni Ferðamálastofu Íslands

Aðrir

Hótel Tangi
Hótel
  • Hafnarbyggð 17, Vopnafjörður
  • 690 Vopnafjörður
  • 473-1203 , 845-2269
Hápunktar
9.04 km
Múlastofa

Í Múlastofu, Kaupvangi á Vopnafirði, er að finna sýningu um líf og list Jóns Múla og Jónasar Árnasona en þeir bræður voru þjóðkunnir fyrir söngleikjasmíð sína, tónsköpun og yrkingar. Þeir andans bræður voru fæddir Vopnfirðingar og þótti ávallt vænt um tengsl sín við sveitarfélagið. Setrið - sem Magnús Már Þorvaldsson leiddi f. h. sveitarfélagsins og hannað er af Birni G. Björnssyni sýningarhönnuði - er stærsta menningarverkefni sem Vopnafjörður hefur ráðist í fyrr og síðar. Í tengslum við það er haldin árleg menningarhátíð, Einu sinni á ágústkvöldi.

Náttúra
24.39 km
Gljúfurárdalur

Gljúfurárdalur er í Vopnafirði vestan Hellisheiðar. Um dalinn er gönguleið frá þjóðvegi niður að sjó að Krumsholti. Skammt neðan þjóðvegar fellur Neðrifoss, tilkomumikið vatnsfall, og er búið er að reisa útsýnispall gegnt honum. Þaðan liggur stikuð gönguleið um Drangsnes þar sem Þorsteinn uxafótur bjó á 10. öld en frá honum segir í samnefndum þætti. Á nesinu er að finna tóftir verbúða og nausts í þessari náttúrulegu höfn. Skammt frá er svo Krumsholt sem þekktast er vegna mannlýsinga úr þætti Þorsteins uxafótar.

Náttúra
13.34 km
Sandvík

Sandvík er mikil og svört sandströnd innst í Vopnafirði. Ströndin er fjölskyldupardís, gerð af náttúrunnar hendi. Þar má tína skeljar, fá sér göngutúr, skoða fuglana, byggja sér sandkastala eða hvað sem hugurinn girnist.

Fyrir miðri ströndinni strandaði flutningaskipið Mávurinn 2. október 1981. Mannbjörg varð en enn má sjá glitta í skipsflakið.

Aðgengi að Sandvík hefst við vegslóða sem liggur niður að víkinni innan við golfvöllinn.

Við hvetjum alla til að fara mjög varlega í fjörunni. Sjórinn getur verið hættulegur og má ekki láta börn vera eftirlitslaus. Þá á Hofsá það til að flæða yfir sandinn á vorin. Þar af leiðandi gætu myndast kviksyndi á sandinum.

Farið að öllu með gát, berum virðingu fyrir náttúrunni og þeim hættum sem þar kunna að leynast.

GPS: 65.735784 - 14.857769

Náttúra
24.94 km
Gljúfursá

Gjúfursárfoss fellur fram í litfögru gljúfri rétt fyrir neðan bílastæðið. Þaðan er svo merkt gönguleið er niður með Gljúfursánni, niður að sjó, um Drangsnes.

Að ganga meðfram þverhníptum klettunum er mikil upplifun og lætur fáa ósnortna. Gönguleiðin nær að Krummsholti. Þar eru velsjáanlegar ævafornar tóftir, frá víkingaöld að því að talið er. Þar á Þorsteinn uxafótur að hafa búið. Þegar maður virðir fyrir sér þessar mannvistarleyfar læðist að manni sú ósk að jörðin gæti talað og flutt okkur sögur forfeðranna.

Hinumegin fjarðarins má sjá kauptún Vopnfjarðar sem stendur á tanga sem sagar út í fjörðinn. Tanginn er kallaður Kolbeinstangi.

Áin Gljúfursá var á fyrri tíð mikill farartálmi þegar ferðast þurfti austur fyrir Hellisheiði eystri. Mörg slys urðu þegar fólk var að reyna að þvera hana fótgangandi eða á hestum. Ef gengið er frá bílastæði upp með ánni er komið að gömlu brúnni yfir Gljúfursá. Þar má sjá hleðslur frá fyrstu brúnni sem var byggð yfir ána, rétt um aldamótin 1900 og þótti þá mikið mannvirki.

Sagt er að fyrsta brúin yfir ána hafi verið byggð í kjölfar banaslyss sem þar átti sér stað þegar maður á hesti freistaði þess að komast yfir ána að vetri til.

Náttúra
23.55 km
Þverárgil

Þverárgil er einstaklega fallegt þar sem sjá má litríkt líparít, súrt innskotsberg frá gamalli megineldstöð sem stingur skemmtilega í stúf við annars dökkt basískt umhverfi Smjörfjallanna fyrir ofan gilið. Fuglalíf á þessu svæði er mikið sérstaklega íslenskir mófuglar. Úsýnið er stórfengilegt yfir Hofsárdalinn og á haf út.

Gönguleiðin er um tveggja klukkustunda löng og liggur aðeins uppá við. Því setjum við tvo skó á erfiðleikastig göngunnar.

Upphafsreitur göngunnar er við veg 919, Sunnudalsveg.

Powered by Wikiloc
Náttúra
10.25 km
Fuglabjargarnes

Fuglabjargarnesið er á Náttúruminjaskrá Íslands vegna fagurrar og fjölbreyttrar strandar og mikils fuglalífs. Gengið er í fjörunni niður á nesið þar sem taka við þverhnýt björg beint niður í sjó, steindrangar sem gnæfa upp úr sjónum, gróðursæl víðátta og víðsýni yfir opið hafið. Upplifun í íslenskri náttúru eins og hún gerist best.

Austurland

Bæir og þorp

Allir bæir á Austurlandi hafa sín sérkenni og í sumum sjávarþorpunum má sjá greinileg erlend áhrif. Til að mynda á Fáskrúðsfirði þar sem frönsk áhrif eru sterk. Þar má t.d. lesa götuheitin á íslensku og frönsku! Þá má sjá norsk áhrif í byggingum á Eskifirði og á Seyðisfirði en þarlendir sjómenn höfðu búsetu á þessum stöðum á síðustu og þarsíðustu öld. Á Egilsstöðum eru engin slík áhrif að finna en bærinn er sá yngsti á Austurlandi, varð til á fimmta tug aldarinnar sem leið, og hefur orðið að þjónustumiðstöð Austurlands.  

Map Vopnafjörður Borgarfjörður Eystri Egilsstaðir Seyðisfjörður Mjóifjörður Neskaupstaður Breiðdalsvík Eskifjörður Reyðarfjörður Fáskrúðsfjörður Stöðvarfjörður Djúpivogur