Leita
Finnur þú það ekki? Prófaðu leitina :)

Sámur bóndi

Hrafnkelsdalur gengur suður úr Jökuldal, gegnt bænum Brú. Dalurinn er allvel gróinn og þar er talsvert birkikjarr og víðirunnar.

Bærinn Aðalból í Hrafnkelsdal stendur í 390 metra hæð yfir sjávarmáli og er meðal þeirra bæja sem lengst eru frá sjó á Íslandi. Bærinn er þekktur úr Hrafnkelssögu Freysgoða en þar reisti Hrafnkell Hallfreðarson bú. Mörg örnefni í landi Aðalbóls minna á söguna. Útibúr Hrafnkels goða er þar í túni en Faxamýrar og Faxagil eru alllangt fyrir innan bæinn og þar eru einnig Faxahús.

Á Aðalbóli er rekin ferðaþjónusta í nafni Sáms bónda ehf. Þar stendur til boða:

  • Gisting með eða án morgunverðar, svefnpokapláss eða uppbúin rúm.
  • Tjaldstæði.
  • Leiðsögn um söguslóðir Hrafnkels Freysgoða.
  • Skotveiðiferðir á rjúpu, heiðagæs og leiðsögn með hreindýraveiðum.

Sámur bóndi ehf.
Aðalból 2
701 Egilsstaðir
Sími:471-2788
Fax:471-2789

Sámur bóndi

Aðalból II

Hrafnkelsdal

GPS punktar N65° 1' 4.636" W15° 34' 17.606"
Gisting 13 Rúm
Opnunartími 01/06 - 31/08
Þjónusta Heimilisveitingar Svefnpokapláss Hótel / gistiheimili Tjaldsvæði Ferðamannaverslun Bar

Sámur bóndi - ferðaupplýsingar

Úr gagnagrunni Ferðamálastofu Íslands

Saga og menning
3.77 km
Aðalból

Við Aðalból í Hrafnkelsdal, bæ Hrafnkels Freysgoða, má enn sjá haug Hrafnkels. Í grenndinni hafa fundist ýmsir fornir gripir sem þykja styðja sannleiksgildi Hrafnkelssögu.

Náttúra
20.44 km
Stuðlagil

Stuðlagil

Á Jökuldal á Fljótsdalshéraði er að finna náttúruperlu sem lengi var lítt þekkt. Hún kom ekki almennilega í ljós fyrr en eftir að Kárahnjúkavirkjun var tekin í notkun og vatnsmagnið í Jökulsá á Dal, eða Jöklu, snarminnkaði. Þessi perla er sá hluti Jökulsárgljúfurs sem nefnist Stuðlagil. Nafnið er dregið af því að þar er að finna eina stærstu og fallegustu stuðlabergsmyndun á Íslandi.

Það eru tvær leiðir í boði til þess að skoða gilið. Annars vegar er hægt að keyra suður af Hringveginum (vegi nr. 1) rétt innan við Skjöldólfsstaði, inn á veg númer 923. Þaðan eru um 19 kílómetrar að bænum Grund en þar eru bílastæði og merktur stígur að gilinu (gangan er um 250 metrar, eða 5 mínútur). Þar er gott útsýni niður í gilið og út eftir því, og fjölbreytt stuðlabergið nýtur sín. Þó gangan sé stutt þarf að fara varlega því stígurinn liggur að hluta í miklum bratta.

Til þess hins vegar að komast ofan í gilið, niður að ánni, þarf að fara að gilinu austan megin. Þá er keyrt að brúnni hjá bænum Klausturseli, einnig eftir vegi nr. 923 um 14 kílómetra frá Hringveginum. Hafa skal í huga að það má ekki að keyra yfir brúna heldur leggja á bílastæðu vestan megin við hana. Þaðan er gengið yfir brúna og eftir slóða (rúmlega 5 kílómetra) þangað sem hægt er að komast niður í gilið. Hafa ber í huga að klettar og steinar geta verið blautir og þar af leiðiandi mjög sleipir. Á leiðinni, um 2 kílómetra frá brúnni er tignarlegur foss, Stuðlafoss, sem fellur fram af þverhníptu stuðlabergi. Þessi gönguleið er rúmlega 10 kílómetrar samanlagt, og þegar gert er ráð fyrir að stoppað sé við fossinn og gilið sjálft, gæti hún tekið 3 tíma.

Nauðsynlegt er að hafa í huga, sama hvora leiðina fólk velur að fara, að náttúra svæðisins er viðkvæm. Stuðlagil er nýr áfangastaður og aðsóknin er mikil en uppbygging skammt á veg komin. Gestir eru því hvattir til þess að bera virðingu fyrir umhverfinu og ganga snyrtilega um. Á tímabilinu 1. maí - 10. júní verpa fjölmargar heiðagæsir á svæðinu og eru gestir þá hvattir til þess að halda sig innan merktra gönguleiða og láta fuglana í friði.

Náttúra
22.72 km
Snæfell

Snæfell (1833 m) er hæsta fjall Íslands utan jökla og er fjallið sjálft og svæðið umhverfis það innan marka Vatnajökulsþjóðgarðs. Sumar rannsóknir benda til þess að fjallið kunni enn að vera virk eldstöð, aðrar telja ekki svo vera. Snæfell er fremur auðvelt uppgöngu, en þó ekki fyrir óvana, er þá lagt af stað skammt sunnan við Snæfellsskála sem er undir vesturhlíð Snæfells, eða frá Sandfelli að norðanverðu. Að fjallinu liggur sumarvegur sem fær er fjórhjóladrifnum bílum og dugir dagurinn til að klífa það, sé lagt upp frá Egilsstöðum snemma að morgni. Gott er að reikna með um 7-9 tímum í göngu.

Powered by Wikiloc
Náttúra
9.50 km
Hafrahvammagljúfur

Hafrahvammagljúfur á Austurlandi er með stærstu og stórfenglegustu gljúfrum landsins. Þar sem það er hæðst er það um 200 metrar og er gljúfrið um 8 kílómetrar að lengd. Falleg merkt gönguleið er meðfram gljúfrinu og niður að Magnahelli. Það þarf fjórhjóladrifsbíl til að keyra að gönguleiðinni en hægt er að sjá hluta gljúfursins frá Kárahjúkum og dugar venjulegur fólksbíll til að komast þangað. Þetta gljúfur lætur engan ósnortinn.

Náttúra
24.03 km
Vatnajökulsþjóðgarður

Vatnajökulsþjóðgarður er 14.141 ferkílómetrar að flatarmáli, eða um 13,7% af Íslandi. Ríflega helmingur þjóðgarðsins er jökull og þar er að finna einstök dæmi um samspil elds og íss, landmótunar jökla og vatnsfalla. Vatnajökulsþjóðgarður var stofnaður 9. júní 2008 en markmiðið með stofnun og rekstri þjóðgarðsins er að vernda Vatnajökul og landsvæði honum tengd. Innan austursvæðisins er að finna náttúruperlur eins og Snæfell, Eyjabakka, Lónsöræfi, Kverkfjöll, Hvannalindir, Hveragil og margt, margt fleira.

Náttúra
8.91 km
Magnahellir

Ekið frá Kárahnjúkastíflu eftir góðri jeppaslóð að norðan út Lambafell að krossgötum við Laugavelli. Farið er niður að bílaplani við Dimmugljúfur. Þar er upplýsingaskilti og upphaf merktrar gönguleiðar, sem liggur í Hafrahvamma og Magnahelli. Hólkurinn með gestabók og stimpli er í hellinum. Það var siður Brúarbænda að fornu að hafa sauðfé sitt inni í hvömmum nokkrum við Jökulsá á vetrum í helli þeim, sem þar er og kallaður er Magnahellir. Tekur hann nafn af Magna, bónda, sem fyrrum bjó á Brú, og fann fyrstur upp á að hafa þar sauðfé á vetrum um tíma.

Hluti af Perlum Fljótsdalshéraðs

GPS : N64°99.252-W15°71.683

Powered by Wikiloc
Náttúra
15.23 km
Eiríksstaðahneflar

Gengið frá skilti við Þverá innan við Eiríksstaði á Fremri-Hnefil (947 m). Þar er hólkurinn með gestabók og stimpli. Síðan er gengið á Ytri-Hnefil (922 m), ef vilji er til, og niður í Eiríksstaði. Gaman er einnig að ganga að Hneflaseli, sem fór í eyði 1875, og halda síðan til baka milli Hneflanna niður í Jökuldal.

Hluti af Perlum Fljótsdalshéraðs

GPS : N65°08.617-W15°28.195

Náttúra
18.06 km
Fossahringur

Fossahringur er 8 kílómetra gönguhringur sem byrjar og endar í Laugarfelli, það tekur um 2 -3 klukkutíma að ganga þessa leið. Á gönguleiðinni má sjá 5 fossa og eitt gljúfur. Sumir þessara fossa eru meðal vatnsmestu fossa á Austurlandi og þekktastir þeirra eru Kirkjufoss og Faxi en þeir eru í Jökulsá í Fljótsdal sem rennur út í Lagarfljót.

Gangan er stikuð og nýtur sívaxandi vinsælda meðal göngufólks. Tilvalið er í lok göngu að baða sig í náttúrulaugunum í Laugarfelli.

Powered by Wikiloc
Hálendið
12.44 km
Kárahnjúkar

Kárahjúkar eru móbergshnjúkar austan Jökulsár á Brú gegnt Sauðárdal. Hærri hnjúkurinn er 835 metrar. Jökulsá fellur að Kárahnjúkum í miklu gljúfri, Hafrahvammagljúfri sem er eitt hið dýpsta og hrikalegasta á landinu. Megingljúfrið er um 5 km. langt en allt er gilið frá Desjará að Tröllagili um 10 km. Við Kárahnjúka hefur verið reist mikil virkjun sem sér álverinu á Reyðarfirði fyrir orku.

Kárahjúkavirkjun er stærsta framkvæmd Íslandssögunnar og um leið stærsta raforkuframleiðsla landsins.

Náttúra
6.17 km
Laugavalladalur

Laugavalladalur er gróðurvin skammt vestan Jökulsár á Dal, um 20 km. norðan Kárahnjúka. Þar er unnt að lauga sig heitri laug og skola svo af sér í náttúrulegu steypibaði þar sem lækurinn fellur fram af kletti í litlum fossi. Gæta skal sérstakrar varúðar vegna ofhitnunar vatnsins á úrkomulitlum tímum.

Austurland

Bæir og þorp

Allir bæir á Austurlandi hafa sín sérkenni og í sumum sjávarþorpunum má sjá greinileg erlend áhrif. Til að mynda á Fáskrúðsfirði þar sem frönsk áhrif eru sterk. Þar má t.d. lesa götuheitin á íslensku og frönsku! Þá má sjá norsk áhrif í byggingum á Eskifirði og á Seyðisfirði en þarlendir sjómenn höfðu búsetu á þessum stöðum á síðustu og þarsíðustu öld. Á Egilsstöðum eru engin slík áhrif að finna en bærinn er sá yngsti á Austurlandi, varð til á fimmta tug aldarinnar sem leið, og hefur orðið að þjónustumiðstöð Austurlands.  

Map Vopnafjörður Borgarfjörður Eystri Egilsstaðir Seyðisfjörður Mjóifjörður Neskaupstaður Breiðdalsvík Eskifjörður Reyðarfjörður Fáskrúðsfjörður Stöðvarfjörður Djúpivogur