Leita
Finnur þú það ekki? Prófaðu leitina :)

Bæir og þorp

13228644684_f2c83671f8_z.jpg
Bæir og þorp

Allir bæir á Austurlandi hafa sín sérkenni og í sumum sjávarþorpunum má sjá greinileg erlend áhrif. Til að mynda á Fáskrúðsfirði þar sem frönsk áhrif eru sterk. Þar má t.d. lesa götuheitin á íslensku og frönsku! Þá má sjá norsk áhrif má sjá í byggingum á Eskifirði og á Seyðisfirði en þarlendir sjómenn höfðu búsetu á þessum stöðum á síðustu og þarsíðustu öld. Á Egilsstöðum eru engin slík áhrif að finna en bærinn er sá yngsti á Austurlandi. Varð til á fimmta tug aldarinnar sem leið.  

 

Borgarfjörður eystri

Borgarfjörður eystri er nyrsti fjörðurinn sem gengur inn í Austfjarðahálendið. Formfagur og litskrúðugur fjallahringur umlykur dalinn sem gerir Borgarfjörð að einu fegursta byggðarlagi á landinu. Borgfirðingar stunda landbúnað, sjómennsku og ferðaþjónustu. Bakkagerði er fallegt sjávarþorp þar sem búa um 100 manns. Þorpið er áhugavert, samsett af dreifðri byggð býla og engin götunúmer þar að finna. Íbúarnir eru gestrisnir og listfengir og gangast árlega fyrir vinsælum tónlistarhátíðum. Kirkjan er prýdd altaristöflu eftir Jóhannes Sveinsson Kjarval.

Útsýnisskífan á Álfaborginni

AFÞREYING

Við þorpið er Álfaborgin þar sem drottning íslenskra álfa er sögð búa og þar liggur göngustígur að útsýnisskífu. Í Hafnarhólmanum er eitt besta aðgengi til fuglaskoðunar hérlendis og er svæðið sérstaklega þekkt fyrir blómlega lundabyggð.

Í Hafnarhólma er frábær aðstaða til þess að skoða lunda - og aðra fugla

 

Í og við Borgarfjörð er eitt best skipulagða göngusvæði hérlendis með stórbrotnu og fjölbreyttu landslagi. Gönguleiðir í Stórurð og á Víknaslóðir eru góð dæmi um það. Frá Borgarfirði er hægt að komast til Breiðuvíkur, Húsavíkur og Loðmundarfjarðar eftir jeppaslóða.

 

Svavar Knútur við Lindarbakka

Það er ótrúlega erfitt að nefna einn ákveðinn stað á Austfjörðum sem ég tengi sterkar við en aðra, enda eiga Austfirðir ríflega hnefafylli af hjarta mínu. Djúpivogur og Breiðdalsvík eru dásamleg sjávarpláss með ríka sögu og menningararf sem blæðir úr hverjum steini og þúfu, með bæjarstæði sem fylla hjartað að fornum kenndum. Skriðuklaustur, rammur minnisvarði um stóra drauma og erfiða tíma og fegurð sem lifir, bæði í formi bókmennta og byggingarlistar er líka einn af mínum uppáhaldsstöðum. Seyðisfjörður og Vopnafjörður, hvor á sinn hátt einstakur og svo má lengi telja. En hjartað mitt slær á endanum þyngst handan Dyrfjalla, í Borgarfirði eystri, þar sem amma mín bjó og þar sem ég er alltaf kominn heim. Þar kemur allt heim og saman í hjarta mínu. Hafið, fjöllin, álfaborgin, smábátahöfnin, líf manna og fugla ofin saman í fagurt teppi sem breiðir sig yfir sálina.

Ég finn djúpt þakklæti þegar ég kem austur á firði og þetta þakklæti kórónast í Borgarfirðinum.

Svavar Knútur, tónlistarmaður

Breiðdalsvík

Vöxtur ferðamennsku hefur verið áberandi í mannlífinu á Breiðdalsvík. Skal engan undra því fegurðin í Breiðdal lætur engan ósnortin. Breiðdalur er víðlend sveit miðað við aðra dali sem ganga inn af Austfjörðum. Breiðdalsvík, sem er þjónustumiðstöð hreppsins, er tiltölulega ungt kauptún og fór ekki að byggjast að marki fyrr en upp úr 1960. Um byggð á Breiðdalsvík er ekki vitað með fullri vissu fyrr en um 1880 er Gránufélagið lét reisa þar vörugeymsluhús. Föst búseta var þar þó ekki fyrr en 1896 er Brynesverslun á Seyðisfirði reisti hús undir starfsemi sína efst á Selnesi við austurkrók Selnesbótar. Löng hefð er fyrir fiskvinnslu á staðnum þótt vægi hennar hafi minnkað á seinni árum og áratugum. Vorið 1906 brann verslunarhúsið til kaldra kola og var þá óðar reist nýtt verslunarhús vestan víkurinnar. Stendur það hús enn og telst því elsta hús Breiðdalsvíkur.

Fossinn Beljandi í Breiðdalsá

AFÞREYING

Gamla Kaupfélagshúsið, elsta húsið á Breiðdalsvík, hefur verið gert upp og hýsir nú jarðfræðisetur. Það er vel við hæfi því Austfjarðaeldstöðin er í Breiðdalnum. í húsinu er einnig stofa Stefáns Einarssonar sem var prófessor við John Hopkins háskóla í Baltimore.

Skemmtilegt leiksvæði á Breiðdalsvík

Á Breiðdalsvík og í Breiðdalnum er ýmsar góðar gönguleiðir að finna. Skemmtilegt er að ganga upp á Hellurnar fyrir ofan bæinn en þaðan er frábært útsýni. Í Breiðdalnum er fagur fjallahringur og glæsilegir fossar. Stutt gönguleið er frá vegi að Beljanda, neðsta fossinum í Breiðdalsá, einstaklega fallegt er við gömlu brúna yfir Tinnudalsá. Einnig er hægt að ganga eftir Meleyrinni sem liggur sunnan við Breiðdalsvík.

Á Breiðdalsvík er flott leiksvæði fyrir börn.

Djúpivogur

Berufjörður er um 20 km langur og 2-5 km að breidd. Hann liggur milli Hamarsfjarðar að sunnan og Breiðdalsvíkur að norðan. Upp úr honum ganga Búlandsdalur og Fossárdalur. Búlandstindur setur mikinn svip á fjörðinn og egghvass fjallahringurinn, gnípur og ríolítinnskot eru áberandi. Flikrubergið, sem er grænleitt afbrigði þess er áberandi í lágum grænum höfða norðan megin fjarðarins, sem og sker og boðar í fjarðarmynninu. Nönnusafn og Geislasteinasafn á Teigarhorni er meðal þess sem finnst í Berufirði. Í Berufjörð er hægt að komast eftir hringvegi 1 strandleiðina eða yfir Öxi, frá Fljótsdalshéraði. Djúpivogur er þéttbýlið sunnan fjarðarins. Það stendur í skjóli undir Búlandstindi við náttúrulega höfn og hefur verið verslunarstaður síðan 20. júní 1589. Upphaflegi verslunarstaðurinn var í Gautavík og er hans getið í Landnámabók.

 

AFÞREYING

Djúpivogur er lifandi sjávarpláss og þar er menningunni gert hátt undir höfði. Þar er fugla- og steinasafn sem heldur úti heimasíðu. Í Löngubúð eru söfn Eysteins Jónssonar stjórnmálamanns og Ríkarðs Jónssonar listamanns, en einnig minjasafn og kaffihús. Hægt er að fara í gönguferð um þorpið með sjálfsleiðsögn með smáforritunum Wapp eða PocketGuide. Glæsileg sundlaug, golfvöllur og íþróttasalur eru á Djúpavogi. Skammt frá þorpinu er fólkvangurinn Teigarhorn sem er dásamlegt útivistarsvæði.

 

 

Á Djúpavogi eru margar merktar gönguleiðir á öllum erfiðleikastigum. Ýmsar hefðisr tengjast sumum þeirra, s.s. ganga á Búlandstind og Faðivorahlaup sem koma frá útvarps- og blaðamanninum Stefáni Jónssyni sem bjó þar lengi.

Á Djúpavogi má finna leiksvæði fyrir börn, góða sundlaug og golfvöllur Golfklúbbs Djúpavogs er í Hamarsfirði.

 

Einn af mínum allra kærustu stöðum á Austurlandi eru sandarnir á Djúpavogi. Kyrrðin er áþreifanleg og svarti sandurinn virðist endalaus strönd yst á Búlandsnesi. Ég fæ hreinlega aldrei nóg og hér eru ný ævintýri við hvert fótmál, í hverri heimsókn. Þetta er staðurinn sem heillaði í upphafi, nóg til að taka skrefið og flytja alla leið í paradísina.Hér er brasað vikulega með börnin, leitað að skeljum og steinum, skokkað og jógað, allt til skiptis. Hálfpartinn í bakgarðinum heima, heppin ég!

Gréta Mjöll Samúelsdóttir atvinnu- og menningarmálafulltrúi

 
Egilsstaðir

Þéttbýlið Egilsstaðir var stofnað 1947 með lögum frá Alþingi. Nafnið dregur bærinn af stórbýlinu Egilsstöðum sem nú stendur rétt fyrir utan þorpið. Við stofnun bæjarins voru 110 íbúar á staðnum. Sjúkrahúsið og búvélaverkstæði komu til skjala 1945, síðar bættist Kaupfélag Héraðsbúa við og varð þetta kveikjan að mikilli fjölgun íbúa. Opinberar stofnanir og þjónusta eru helstu afkomu-uppsprettur. Á Egilsstöðum er alþjóðaflugvöllur, menntaskóli, menningarhús, safnastofnun og afgreiðsla sýslumanns ásamt margs konar annarri þjónustu.

Egilsstaðir

AFÞREYING

Vegferð um Egilsstaði er upplagt að hefja við hringsjá á Hömrum fyrir ofan gamla Sláturhúsið sem nú er menningarmiðstöð. Gálgaklettur er skammt frá Egilsstaðakirkju . Þar var fyrrum aftökustaður og er áletraður skjöldur til minningar um það. Frá kirkjunni er víðsýni yfir Löginn – og margir reyna að koma auga á Lagarfljótsorminn. Annar útsýnisstaður er á klettinum við sundlaugina þar sem Kvennavarðan stendur.

Við Fardagafoss

 

Margar og fjölbreyttar gönguleiðir eru á Egilsstöðum eða í næsta nágrenni. Upplagt er að fara í kvöldgöngu eða brjóta upp langa bílferð með göngu í Selskógi. Einnig er skemmtilegt að ganga að Taglarétt, Rjúkandafossum eða Fardagafossi. Í fellunum, hinum megin við Lagarfljótið, er gaman að ganga á Hrafnafell.

Ingunn Snædal á Landsenda

Einn af uppáhaldsstöðum mínum á Austurlandi er Landsendi, stórkostlegur staður við nyrðri enda Héraðssands og við rætur hinnar mögnuðu Hellisheiði, sem býður upp á undurfagra göngu um sendnar fjörur, grónar hlíðar, kynlegar og ægifagrar klettamyndanir, sjó, seli og útsýni yfir hin litríku Móvíkurflug. Betri náttúrustemning er vandfundin og svo er nafnið Landsendi alveg sérstaklega ævintýralegt.

Ingunn Snædal, skáld og þýðandi

Eskifjörður

Eskifjörður er innfjörður úr Reyðarfirði norðanverðum. Sunnan megin við hann er Vöðlavík, með sendinni strönd og malarrifi. Á yfirborðinu er Eskifjörður sjávarpláss í hnotskurn og útbærinn með sínum gömlu sjóhúsum, sem minna okkur á upprunann og ástæðu þess að búið er á fjörðunum, er tvímælalaust ein af perlum Austurlands. Námuvinnsla á silfurbergi var í Helgustaðanámu frá 17. öld fram á fyrri hluta 20. aldar. Nú eru helstu atvinnuvegir útgerð og ferðaþjónusta. Á Eskifirði er ýmis þjónusta, svo sem skóli og leikskóli, heilsugæsla, lögreglustöð, og Sýslumannssetur.

Hólmatindur og Hólmanes 

Norðan fjarðarins standa Askja og Hólmatindur sem eru einkennistákn fjarðarins. Milli Reyðarfjarðar og Eskifjarðar er ekið yfir Hólmaháls en þar er einstaklega skemmtilegt útivistarsvæði.

Randulffssjóhús á Eskifirði

AFÞREYING

Eitt af því sem setur skemmtilegan svip á Eskifjarðarkaupstað eru gömlu sjóhúsin sem standa út í fjörðinn. Sum þeirra eru lifandi söfn sem fróðlegt er að heimsækja. Gamlabúð er sjóminja- og atvinnuvegasafn, þar er sagan gerð lifandi og leiðsögnin frábær. Listaverkið sem prýðir Hraðfrystihúsið er einnig vel þess virði að skoða, sem og Myllan og fossinn í Bleiksánni sem er upplýstur árið um kring.

 

 

Á Hólmahálsi er útsýnisstaður við völvuleiði sem vert er að skoða og neðan vegar er friðlýstur fólkvangur. Þar eru gönguleiðir merktar og tiltölulega gott aðgengi er að líflegu fuglabjargi. Helgustaðanáma er vel þess virði að skoða en þar var mesta silfurbergsnáma heims og þangað er merkt gönguleið. Á leiðinni út að Helgustöðum er Mjóeyri en þar var síðasti aftökustaður á Austurlandi. Börn og unglingar bæjarins hafa sett þar upp vegalengdaskilti til allra helstu staða heims. Þau hafa einnig markað útlínur hvals í fjörunni gengt bænum.

Á Eskifirði er ný útisundlaug með dásamlegu útsýni og golfvöllurinn Byggðarholtsvöllur.

Fáskrúðsfjörður

Fáskrúðsfjörður er staðsettur í hjarta Austfjarða. Næstur honum til norðurs er Reyðarfjörður og skilur Vattarnes á milli með illræmdum skriðum sínum. Sunnan við er Stöðvarfjörður og skilur Gvendarnes þar á milli. Eyjan Skrúður í fjarðarmynninu er nafngjafi fjarðarins. Fáskrúðsfjörður er stundum kallaður „franski bærinn“ enda var Fáskrúðsfjörður fyrr á tíðum ein helsta bækistöð franskra sjómanna hér á landi. Frakkar reistu þar spítala, kapellu og skammt frá bænum er að finna kirkjugarð franskra sjómanna. Kauptúnið Búðir býr að mörgum fallegum gömlum húsum og snyrtilegu umhverfi. Í daglegu tali er Fáskrúðsfjörður nefndur "franski bærinn" og götuskilti eru bæði á íslensku og frönsku. Á Fáskrúðsfirði er öflugt atvinnulíf en staðurinn byggir afkomu sína að mestu á sjávarútvegi og þjónustu og hefur atvinnulíf blómgast með tilkomu ganganna og stækkun atvinnusvæðis.

Franska safnið á Fáskrúðsfirði

AFÞREYING

Heimamenn eru stoltir af tengingu sinni við Frakkland og hafa þeir hlúð að þessum menningararfi sínum. Frakkar á Íslandsmiðum er einstaklega metnaðarfullt safn veitir glögga innsýn í líf frönsku sjómannanna og starfsemi Franska spítalan. Safnið er að hluta til húsa í Læknishúsinu og Franska spítalanum en aðallega undirgöngum sem tengja húsin tvö saman. Á Fáskrúðsfirði hafa alls fimm frönsk hús verið gerð upp á vegum Minjaverndar en auk spítalans og Læknishússins eru það Sjúkraskýlið, Litla kapellan og Líkhúsið. Rétt utan við þéttbýlið er Franski grafreiturinn en þar er minnisvarði með nöfnum 49 franskra og belgískra sjómanna sem létu lífið á Íslansmiðum. Bæjarhátíðin Franskir dagar er haldin síðustu helgina í júlí ár hvert.

Fallegur dagur í Fáskrúðsfirði

Í öðru gömlu húsi, Wathneshúsi, er Norðurljósahúsið. Þar er boðið upp á stórbrotna sýningu um litadýrð norðurljósanna. Einnig er skemmtilegt að ganga um þorpið og skoða fallegar styttur og minnisvarða sem eru staðsettir víðs vegar um bæinn.

Skemmtilegar gönguleiðir eru víða í Fáskrúðsfirði. Þar má nefna Vattarnesið en þaðan er gott útsýni yfir í Skrúð, og sunnan megin í firðinum er hægt að ganga á Sandfell sem er glæsilegt og sérstætt líparítfjallUtarlega í firðinum sunnanverðum er Hafnarnes, lítið þorp sem fór í eyði upp úr 1970. Þar má enn sjá gömul hús og ýmsar minjar sem skemmtilegt er að rölta um og skoða.

Á Fáskrúðsfirði er hægt að fara í golf á Golfvellinum Nesi og í sund í sundlaug Fáskrúðsfjarðar.

Albert Eiríksson

Einn af mínum uppáhaldsstöðum er Franski grafreiturinn á Fáskrúðsfirði. Þúsundir franskra sjómanna létust við Ísland og aðeins fáir hvíla í vígðri mold. Það er áhrifaríkt að ganga um garðinn og velta fyrir sér lífi sjómannanna sem stunduðu sjóinn hér við land í marga mánuði ár hvert fjarri ástvinum og fósturjörðinni. Fáskrúðsfjörður var ein aðalbækistöð franskra sjómanna í aldalangri sjósókn þeirra til Íslands og hvergi á Íslandi eru álíka minjar og þar. 

Albert Eiríksson, matreiðslumaður // @alberteldar 

Mjóifjörður

Mjóifjörður er 18 km. langur og skerst inn í ströndina millum Norðfjarðarflóa og Seyðisfjarðar. Hann er einstaklega veðursæll, berjablár og girtum tignarlegum fjöllum. Leiðin til Mjóafjarðar frá Fljótsdalshéraði er þéttbýlisbúum og öðrum gestum einstök upplifun, allt að Dalatanga þar sem er bíða viti og býli við ysta haf. Á leiðinni eru fagrir fossar, lækir, skriður, klettar, dalir og annað hið besta er austfirsk náttúra hefur fram að bjóða. Fara má sjóleiðina með flóabáti frá Neskaupstað tvisvar í viku. Brekkuþorp er snotur þéttbýliskjarni er byggir á sjávarútvegi, landbúnaði og ferðaþjónustu.

Neskaupstaður

Fram á miðja síðustu öld voru samgöngur við Neskaupstað eingöngu á sjó og þar til nýlega lá leiðin til Neskaupstaðar yfir erfiðan fjallveg um Oddskað. Ný jarðgöng opnuðu í oktober 2017. Þessi göng rjúfa einangrun staðarins. Neskaupstaður hefur þurft að vera sjálfbjarga um ýmislegt sem sést í öflugu og atvinnulífi og sérstaklega blómlegu menningar- og íþróttalífi. Sjávarútvegur, fiskvinnsla og tengd þjónusta er aðalatvinnuvegur íbúanna. Á Neskaupstað er Fjórðungssjúkrahús Austurlands og Verkmenntaskóli Austurlands. Þá er nokkur landbúnaður í Norðfjarðarsveit.

Þungarokkshátíðin Eistnaflug er haldin árlega í Neskaupstað. Ljósmynd Helga Kvam

Menningarstarfsemi er öflug og listiðnaður blómstrar. Íþróttalíf er öflugt; blakdeild Þróttar er í fremstu röð á landinu, sundaðstaða með ágætum, golfvöllur er á staðnum og kajakklúbburinn Kaj er hinn elsti á landinu.

Fólkvangur Neskaupstaðar er frábært útivistarsvæði

AFÞREYING

Fólkvangur Neskaupstaðar var friðlýstur 1972 og er yndisreitur Norðfjarðarbúa. Þar eru stuttar gönguleiðir og fróðleikur um ýmis náttúrufyrirbæri. Það er ekki skortur á áhugaverðum göngu- og ferðaleiðum í Norðfirði og hefur Ferðafélag Fjarðamanna verið ötult við merkingu þeirra. Gerpissvæðið, eyðifirðirnir Hellis- og Viðfjörður, Vöðlavík og Sandvík eru skemmtileg svæði og söguslóðir tengdar sjósókn og búsetu erlendra aðila.

Kajakklúbber er starfræktur í Neskaupstað

Mikil upplifun er að fara í Páskahelli, t.d. frá Norðfjarðarvita. Völurnar sem byltast með öldunni upp og niður fremja tónlist allt eftir veðurfari. Þær eru misstórar og hljóma aldrei alveg eins; sannkölluð sjávarharpa. Páskahellir er þægilegur viðkomustaður ferðamanna; stutt að fara, undurfallegt landslag, náttúrustígur með upplýsingaskiltum, dúfur í varpi, sjávarlíf í pollum, holur eftir forn tré, fallegt útsýni, sérkennilegar urðir og margt fleira.

Í Neskaupstað er að finna leiksvæði fyrir börn, skemmtilega sundlaug og hægt er að spila golf á Grænanesbökkum

 

Uppáhalds staðurinn minn er Drangaskarð milli Norðfjarðar og Mjóafjarðar. Um það liggur gömul þjóðleið og útsýnið yfir Neskaupstað, fjörðinn, flóann og Barðneshornið fyllir mig mikilli vellíðan en átthagafjötrarnir láta líka á sér kræla. Ég hef gengið oftar en ég hef tölu á upp í Drangaskarð og það er alltaf jafn gott og gefandi.

Þorbergur Ingi Jónsson, ofurhlaupari frá Neskaupstað

Reyðarfjörður

Reyðarfjörður varð óvænt heimsþekktur er ákveðið var að taka upp sjónvarpsþættina Fortitude í bænum og næsta nágrenni hans. Í raunveruleikanum er Reyðarfjörður vinalegur staður þótt fáir bæir hafi gengið í gegnum jafn miklar breytingar á síðustu árum í kjölfar uppbyggingar stóriðju. Bæjarbragurinn hefur breyst mikið á seinni árum og nýir íbúar eru duglegir að gera bæinn að sínum. Reyðarfjörður er lengstur Austfjarða um 30 km langur. Hann liggur milli Vöðlavíkur að norðan og Fáskrúðsfjarðar að sunnan. Undirlendi er talsvert, dýpi mikið og fjörðurinn er veðursæll. Þorpið nefnist Búðareyri og stendur að norðanverðu í firðinum. Í gegnum bæinn fellur Búðará. Helstu atvinnuvegir eru þjónusta og verslun en stærsti vinnustaðurinn er álver Alcoa við Hraun. Höfuðstöðvar Vegagerðar ríkisins á Austurlandi eru á Reyðarfirði og um bæinn liggja krossgötur til Héraðs og hinna fjarðanna í sveitafélaginu Fjarðabyggð.

Horft yfir fjörðinn

AFÞREYING

Reyðfirðingar lifðu litríka tíma á dögum hernámsins. Þangað komu Bretar, Norðmenn og Bandaríkjamenn. Það er því viðeigandi að Íslenska stríðsárasafnið sé á Reyðarfirði. Safnið gefur góða mynd af þeim tíma Íslandssögunnar og finna má stríðsminjar víðsvegar um fjörðinn. Í kirkjugarðinum hvíla nokkrir breskir hermenn. Á Kollaleiru er munkaklaustur.

Búðará

GÖNGULEIÐIR

Margar merktar gönguleiðir eru í og við Reyðarfjörð. Vinsælt er að ganga á Grænafell og er þá oftast farið frá Fagradal. Ganga upp með Geithúsárgili er fögur og hrikalegt gilið er augnayndi. Gönguleiðin um Stuðlaskarð til Fáskrúðsfjarðar er einnig skemmtileg og auðveld. Jeppaslóðar liggja um Þórdalsheiði til Skriðdals.

 

Ég bjó í nokkur ár á Reyðarfirði og það er einn fallegasti staðurinn á landinu, án efa. Það er einhver sérstök orka sem er á Austurlandi og ég tengi hana við fjöllin. Það er kraftur og í senn mikil kyrrð sem fylgir fjöllunum fyrir utan fegurðina. Það er ekki auðvelt að velja uppáhalds staðinn minn á Austurlandi, ég er alin upp á Akranesi en ber mjög sterkar taugar til Austurlands og nýt þess í botn þegar ég kemst þangað. Reyðarfjörður, Vopnafjörður, Egilsstaðir, Seyðisfjörður og ég gæti talið lengi áfram. Hver staður með sinn sjarma og hver öðrum fallegri. Ég heimsótti Austurland vegna vinnu minnar í fyrra og hitti frábæra einstaklinga sem eru í nýsköpun í matargerð og ég var svo heppin að fá  gott veður. Við keyrðum yfir Öxi og stoppuðum efst uppi, fórum út í bílnum og vorum hugfangin af fegurðinni.

Eva Laufey Kjaran Hermannsdóttir, dagskrárgerðarkona

 

 

Seyðisfjörður

Seyðisfjarðarkaupstaður fékk kaupstaðarréttindi árið 1895. Á Seyðisfirði er fjöldi gamalla timburhúsa sem kúra í skjóli hárra og formfagurra fjalla. Litrík, norskættuð timburhúsin frá fyrstu áratugum 20. aldarinnar gera Seyðisfjörð einstakan meðal bæja á Íslandi. Fjölmargir listamenn hafa komið við sögu Seyðisfjarðar og hafa dvalið þar við listsköpun um lengri eða skemmri tíma. Frá náttúrunnar hendi er hafnaraðstaðan í firðinum einstök og hefur hún gert Seyðisfjörð að mikilvægri samgönguæð allt frá aldamótunum 1900 til dagsins í dag. Eina farþega- og bílaferjan sem siglir milli Íslands og meginlands Evrópu kemur til Seyðisfjarðar vikulega. Fiskvinnsla og útgerð hafa verði aðalatvinnuvegurinn fram til þessa en ferðaþjónusta vex stöðugt ásmegin og má finna fjölbreytta gisti- og veitingastaði í bænum. Í bænum er tónlistarskóli, listalýðskóli, heilsugæsla og ágæt aðstaða til hvers kyns íþróttaiðkunar.

Hýr halarófa er árviss viðburður.

MANNLÍF

Seyðisfjarðarkaupstaður er rómaður fyrir afslappað andrúmsloft og úrval menningarviðburða. Þar er að finna Tækniminjasafn Austurlands, Fjarðarselsvirkjun og hljóðskúlptúrinn Tvísöng. Skaftfell, miðstöð myndlistar á Austurlandi, stendur fyrir sýningum árið um kring. Þar er m.a. að finna verk eftir hinn kunna listamann Dieter Roth og The Dieter Roth Academy.

Á Seyðisfirði er fjöldi gönguleiða.

ÚTIVIST

Fjölbreyttir möguleikar eru til útivistar í Seyðisfirði. Þar má bæði finna langar og stuttar gönguleiðir, á borð við Fossagönguna, Fjarðarselshringinn, Tvísöng og Vestdal. Einnig er hægt að skella sér í fjallgöngu á Bjólf, Hádegistind eða Strandartind. Það er líka skemmtilegt að rölta um bæinn í rólegheitum og skoða gömlu húsin.

Á Seyðisfirði eru leikvellir fyrir börn og einnig má finna bæði golf- og folfvöll. Svo er hægt að skella sér í sund í hinni sjarmerandi Sundhöll Seyðisfjarðar.

Stafdalur

Uppáhaldsstaðurinn minn er Stafdalur og nágrenni, skíðasvæði Seyðfirðinga og Egilsstaðabúa. Það eru ekki margir staðir á Austurlandi sem ég hef eytt meiri tíma á um ævina, æskuheimilið mitt talið með. Ég byrjaði að skíða þar tveggja ára, æfði skíði fram á unglingsaldur og hef svo stundað snjóbretti þar alla tíð síðan. Það fer um mig alveg sérstök sælutilfinning að koma þangað hvern vetur vegna minninganna sem tengjast staðnum en í seinni tíð kemst ég líka alltaf betur og betur að því að þetta er eitt besta skíðasvæði landsins, sérstaklega fyrir fólk sem vill skíða fyrir utan brautir, en möguleikarnir eru ótal margir og ég er ennþá að finna faldar perlur á svæðinu.

Ívar Pétur Kjartansson, tónlistar- og snjóbrettamaður

Stöðvarfjörður

Stöðvarfjörður liggur milli Fáskrúðsfjarðar og Breiðdalsvíkur. Fjörðurinn er grunnur og er undirlendi takmarkað að sunnanverðu. Inn af firðinum skerast Jafnadalur og Stöðvardalur. Um Stöðvardal fellur samnefnd á út í fjörð og myndar svonefnda Öldu við sjóinn. Kauptúnið hét áður Stöð og er einstaklega snyrtilegt þorp. Stöðfirðingar hafa viðurværi sitt af sjávarútvegi en þar þrífst einnig blómlegur listiðnaður og ferðaþjónusta.

Stytta af Petru Sveinsdóttur

Flestir landsmenn hafa heyrt um stöðfirska steinasafnarann Petru Sveinsdóttur. Í dag einkennist bærinn enn af ástríðufullu og skapandi krafti fólks sem sækir innblástur í þennan fallega fjörð. Þennan kraft má sjá í Sköpunarmiðstöðinni í gömlu uppgerðu frystihúsi. Við hlið þess er smábátahöfnin sem strandveiðar hafa hleypt lífi í.

Fagur fjallahringur

AFÞREYING

Fjallahringur Stöðvarfjarðar er fagur. Ofan kauptúnsins eru Steðji og Sauðabólstindur en sunnan við fjörðinn eru Súlurnar. Súlurnar eru blágrýtistindur sem klofinn er í tvennt. Þangað er krefjandi gönguleið fyrir klifurkappa. Neðra eru Kambanesskriður sem áður fyrr voru verulegur farartálmi. Á Kambanesi er fagurt útivistarsvæði. Í Jafnadal er steinbogi í hlíðum Álftafells og einnig klettaþyrpingin Einbúinn sem skemmtilegt er að skoða.

Í Sköpunarmiðstöðinni

Fjöllin eru auðkleif og sérlega góð gönguleið er upp á svonefndar Landabrúnir og Ólukku. Í þessum gömlu formfögru fjöllum hafa fundist margir þeirra dýrgripa sem prýða steinasafn Petru.

Út með firðinum norðanverðum, rétt við hin gömlu hreppamörk Stöðvarhrepps og Fáskrúðsfjarðarhrepps, er einstakt náttúrufyrirbrigði; gatklettur sem nefnist Saxa. Í austlægum vindáttum dregur Saxa til sín þara, rekavið og annað lauslegt úr sjó, kurlar það í smátt og feykir hátt í loft upp.

Vopnafjörður

Vopnafjörður er sá staður fyrir austan sem er einna þekktastur fyrir veðursæld. Fjörðurinn liggur milli Héraðsflóa og Bakkaflóa, víðlendur og veðursæll. Vopnafjarðarhérað skiptist í þrjá dali og um þá falla þrjár af þekktari laxveiðiám landsins, Hofsá, Vesturdalsá og Selá. Í Selárdal eru heitar uppsprettur og við þær er sundlaug, Selárlaug, sem engan á sinn líka með útsýni yfir Selána. Fyrir miðjum firði er Kolbeinstangi þar sem Vopnafjarðarkauptún stendur. Í kauptúninu Vopnafirði hefur verið verslunarstaður frá fornu fari. Þangað lágu einnig leiðir skipa er fluttu landnema til Vesturheims. Í sveitinni er stundaður hefðbundinn landbúnaður, aðallega með sauðfé, en aðrar meginatvinnugreinar Vopnfirðinga eru sjávarútvegur og ferðaþjónusta.

Horft yfir Sandvíkina til Krossavíkurfjalla

AFÞREYING

Vopnafjörður býður upp á fjölbreytta möguleika til útivistar í einstaklega fallegu og fjölbreyttu umhverfi. Það má finna gönguleiðir við allra hæfi, til dæmis um Þverárgil, Fuglabjargarnes eða um hraunin fyrir ofan þorpið. Skemmtilegt er að fara í Skjólfjörur og skoða Ljósastapa eða í fjölskylduferð í Sandvík. Einnig er hægt, á góðum bíl, að fara í bíltúr yfir Hellisheiði eystri og njóta magnaðs útsýnis.

Minjasafnið á Bustarfelli er einstakt safn í vel varðveittum torfbæ. Þaðan er líka hægt að fara í létta gönguferð upp að Álfkonusteini og Þuríðarfossi. Einnig er það vel þess virði að fara að útsýnisskífunni sem er uppi á Bustarfellinu en þaðan er útsýni yfir sveitina og út Vopnafjörðinn. Á Vopnafirði er Vesturfarmiðstöð Austurlands. Þar er hægt að fræðast um ferðir vesturfaranna og einnig er boðið upp á ættfræðiþjónustu fyrir afkomendur þeirra.

Í þorpinu er að finna leiksvæði fyrir börn og svo er hægt að skella sér í golf á Skálavelli.

Austurland

Bæir og þorp

Allir bæir á Austurlandi hafa sín sérkenni og í sumum sjávarþorpunum má sjá greinileg erlend áhrif. Til að mynda á Fáskrúðsfirði þar sem frönsk áhrif eru sterk. Þar má t.d. lesa götuheitin á íslensku og frönsku! Þá má sjá norsk áhrif í byggingum á Eskifirði og á Seyðisfirði en þarlendir sjómenn höfðu búsetu á þessum stöðum á síðustu og þarsíðustu öld. Á Egilsstöðum eru engin slík áhrif að finna en bærinn er sá yngsti á Austurlandi, varð til á fimmta tug aldarinnar sem leið, og hefur orðið að þjónustumiðstöð Austurlands.  

Map Vopnafjörður Borgarfjörður Eystri Egilsstaðir Seyðisfjörður Mjóifjörður Neskaupstaður Breiðdalsvík Eskifjörður Reyðarfjörður Fáskrúðsfjörður Stöðvarfjörður Djúpivogur