Fljótsdalur
Fljótsdalur - Heimkynni Hengifoss
Fljótsdalur er veðursæll dalur á Fljótsdalshéraði á Austurlandi, kenndur við Lagarfljót, sem um hann rennur. Dalurinn er djúpur og breiður, veðursæll og þekktur fyrir hrífandi landslag og heillandi náttúruundur. Helsta aðdráttarafl svæðisins er Hengifoss, þriðji hæsti foss landsins, um 128 metra hár og afar tignarlegur. Hann fellur í stórbrotið gljúfur og sýna bergveggir þess ólík jarðlög frá eldgosum á tertíertíma jarðsögunnar, blágrýti í bland við fagurrauð millilög sem gefa fossinum einstaka ásýnd og eru sívinsælt myndefni ferðafólks. Þægileg og vel merkt gönguleið liggur upp að fossinum, en það tekur um 40-60 mínútur að ganga alla leið upp frá bílastæðinu.
En Fljótsdalur er meira en bara Hengifoss. Þar er t.a.m. að finna gönguleiðir við allra hæfi, áhugaverð söfn, sýningar og náttúruperlur.
Vatnajökulsþjóðgarður er einn stærsti þjóðgarður í Evrópu og þar er margt að sjá. Hann er sérstakur á heimsvísu vegna fjölbreyttra landslagsforma sem hafa orðið til vegna samspils eldvirkni og jökla.
Einnig er fróðlegt og skemmtilegt að fara í menningar- og fræðasetrið Skriðuklaustur, gestastofuna Snæfellsstofu og Óbyggðasetrið. Ekki má gleyma Lagarfljótsorminum, sem er frægasta skrímsli Fljótsdalshéraðs og býr í Leginum.