Vopnafjörður

Vopnafjörður er nyrstur Austfjarða, liggur milli Héraðsflóa og Bakkaflóa, víðlendur og veðursæll. Vopnafjarðarhérað skiptist í þrjá dali og um þá falla þrjár af þekktari laxveiðiám landsins, Hofsá, Vesturdalsá og Selá. Í Selárdal eru heitar uppsprettur og við þær er sundlaug, Selárlaug, sem á engan sinn líka með útsýni yfir Selána. Fyrir miðjum firði er Kolbeinstangi þar sem Vopnafjarðarkauptún stendur. Í kauptúninu Vopnafirði hefur verið verslunarstaður frá fornu fari. Þangað lágu einnig leiðir skipa er fluttu landnema til Vesturheims. Í sveitinni er stundaður hefðbundinn landbúnaður, aðallega með sauðfé, en aðrar meginatvinnugreinar Vopnfirðinga eru sjávarútvegur og ferðaþjónusta. 

AFÞREYING

Vopnafjörður býður upp á fjölbreytta möguleika til útivistar í einstaklega fallegu og fjölbreyttu umhverfi. Það má finna gönguleiðir við allra hæfi, til dæmis um Þverárgil, Fuglabjarganes eða um hraunin fyrir ofan þorpið. Skemmtilegt er að fara í Skjólfjörur og skoða Ljósastapa eða í fjölskylduferð í Sandvík . Einnig er hægt, á góðum bíl, að fara í bíltúr yfir Hellisheiði eystri og njóta magnaðs útsýnis en þar liggur hæsti fjallvegur landsins.

Minjasafnið á Bustarfelli er einstakt safn í vel varðveittum torfbæ. Þaðan er líka hægt að fara í létta gönguferð upp að Álfkonusteini og Þuríðarfossi. Einnig er vel þess virði að fara að útsýnisskífunni sem er uppi á Bustarfellinu en þaðan er útsýni yfir sveitina og út Vopnafjörðinn. Á Vopnafirði er Vesturfarmiðstöð Austurlands. Þar er hægt að fræðast um ferðir vesturfaranna og einnig er boðið upp á ættfræðiþjónustu fyrir afkomendur þeirra.

Í þorpinu er að finna leiksvæði fyrir börn og svo er hægt að skella sér í golf á Skálavelli.