Bjargey Anna Guðbrandsdóttir (f. 1976) er frá Mýrum á Vesturlandi en hefur búið og starfað á Hallormsstað síðastliðið ár. Hún lærði krosssaum ásamt öðru handverki í grunnskóla en tók nálina ekki upp aftur fyrr en í heimsfaraldrinum. Í verkum Bjargeyjar birtast harðorð slagorð úr kvennabaráttunni á fínlegu handverki þar sem hefðbundinn krosssaumur er nýttur til að vekja forvitni, mótmæla og ögra. Í verkunum fléttar hún saman kvenlegri hefð og natni við róttæka femínska reiði og aktivisma. Hún selur verk sín og útsaumspakkningar undir merkjum Píkusaums.
Á sýningunni sýnir hún ný og gömul verk. Hægt er að kynna sér Píkusaum á instagramsíðu hennar @pikusaumur.
